Mela Ram Wafa
kya kahen va.adon pe yaqin ham kyuun laate jaate hain
dhoka khana paḌta hai dhoka khate jaate hain
taqat-e-zabt-e-gham dil se ruḳhsat hoti jaati hai
arman naale ban ban kar lab par aate jaate hain
raten aish-o-ishrat ki din dukh dard musibat ke
aati aati aati hain jaate jaate jaate hain
andhiyon aur bagulon se kam nahin tere divane
ḳhaak uḌate aate hain ḳhaak uḌate jaate hain
aaj sahar se ghair bahut haal tire bimar ka hai
afsurda afsurda hai log jo aate jaate hain
mai-ḳhana bhi paḌta hai shaiḳh ko rah-e-masjid men
mai-ḳhana bhi aap aksar aate jaate jaate hain
ghair to hain phir ghair ‘vafa’ ghairon ka shikva hi kiya
bad-hali men apne bhi aankh churate jaate hain
Leave a Reply