apne dil ko donon aalam se utha sakta huun main
kya samajhti ho ki tum ko bhi bhula sakta huun main
kaun tum se chhin sakta hai mujhe kya vahm hai
ḳhud zuleḳha se bhi to daman bacha sakta huun main
dil men tum paida karo pahle miri si juraten
aur phir dekho ki tum ko kya bana sakta huun main
dafn kar sakta huun siine men tumhare raaz ko
aur tum chaho to afsana bana sakta huun men
men qasam khata huun apne nutq ke eajaz ki
tum ko bazm-e-mah-o-anjum men bitha sakta huun main
sar pe rakh sakta huun taj-e-kishvar-e-nuraniyan
mahfil-e-ḳhurshid ko nicha dikha sakta huun main
main bahut sarkash huun lekin ik tumhare vaste
dil bujha sakta huun main ankhen bacha sakta huun main
tum agar rutho to ik tum ko manane ke liye
giit ga sakta huun main aansu baha sakta huun main
jazb hai dil men mire donon jahan ka soz-o-saz
barbat-e-fitrat ka har naghma suna sakta huun main
tum samajhti ho ki hain parde bahut se darmiyan
main ye kahta huun ki har parda utha sakta huun main
tum ki ban sakti ho har mahfil men firdaus-e-nazar
mujh ko ye daava ki har mahfil pe chha sakta huun main
aao mil kar inqalab-e-taza-tar paida karen
dahr par is tarah chha jaaen ki sab dekha karen