shikva gar kiije to hota hai guman taqsir ka
har jafa se baab khulta hai naya ta.azir ka
us se paiham guftugu kiije kabhi barham na ho
asl par bhari hai pahlu aap ki tasvir ka
dil ke dar pe hain ye donon rishta-e-ham-sa.egi
gesu-e-shab-gir se hai fikr daman-gir ka
jaur se ghabrane vaale ham nahin hain dekhiye
hausla kab tak javan rahta hai charḳh-e-pir ka
kis liye ḳhvab-e-zuleḳha tishna-e-ta.abir hai
misr men shohra bahut yuun to hua ta.abir ka
gholte hain kis liye vo chashma-e-haivan men zahr
kaam lete hain tabassum se vo kyuun tahqir ka
kaash meri kah rahe hain sabza-o-dasht-o-daman
lala-o-barg-o-saman aalam hai ye kashmir ka
naaz se dekha hai ḳhaliq ne miTate barha
naḳhun-e-tadbir ko likkha hua taqdir ka
ḳhaak se kar ḳhaksari se riyazat se araq
aarzu ki aanch de nusḳha hai ye iksir ka
hasraton se is tarah rah rah ke hoti hai ḳhalish
TuuT jaa.e lag ke dil men jaise paikan tiir ka
sher men ‘iqbal’ ka shaida hai ‘ghalib’ ka asiir
‘hamid’-e-be-bahra-go munkir nahin hai miir ka
Leave a Reply