Aisi Hui Sarsabz-Shikayat Ki Kadi Baat

aisi hui sarsabz-shikayat ki kadi baat

sabze ki tarah kaan men us gul ki padi baat

kyunkar dahan-e-tang se zahir ho kadi baat

munh aap ka chhota hai na niklegi badi baat

gul-rang tire honth hue bar-e-sukhan se

ai jaan uda le gai missi ki dhadi baat

tere sukhan-e-sakht men hai husn-e-nazakat

kanon ko hui pamba-e-mahtab kadi baat

is pech se tum mujh ko udate ho dam-e-nutq

zanjir-e-ram-e-hosh ki banti hai kadi baat

taqrir tiri shakh-e-gul-e-taza hai ai mast

deti hai kaf-e-bada men phulon ki chhadi baat

vasf-e-dur-e-dandan se ye badh jaate hain rutbe

rag rag ko bana deti hai moti ki ladi baat

har kaan hua hai sabad-e-gul se ziyada

kya phuul ke manind tire munh se jhadi baat

dhota hai sukhan dil se ghubar-e-gham-e-duniya

hai gard-e-alam ke liye savan ki jhadi baat

kya mohr banai tire yaqut-e-sukhan ki

manind-e-nagin ham ne anguthi men jadi baat

naqd-e-sukhan-e-pak diya gard-e-qalaq men

ganjine ke manind tah-e-khak gadi baat

jis roz main ginta huun tire aane ki ghadiyan

suraj ko bana deti hai sone ki ghadi baat

ustad ke ehsan ka kar shukr ‘munir’ aaj

ki ahl-e-sukhan ne tiri tarif badi baat