Rulwa Ke Mujhko Yar Gunahgar Kar Nahin

rulva ke mujh ko yaar gunahgar kar nahin

ankhen hain tar to hon mira daman to tar nahin

ummid-e-vasl se bhi to sadma na kam hua

kya dard jaega jo dava ka asar nahin

din ko bhi dagh-e-dil ki na kam hogi raushni

ye lau hi aur hai ye charagh-e-sahar nahin

tanha chalen hain maarka-e-ishq jhelne

un ki taraf khudai hai koi idhar nahin

khali safai-qalb se behtar hai dagh-e-ishq

kya aib hai ki jis ke muqabil hunar nahin

qatil ki raah dekh le dam bhar na zahr kha

ai dil qaza ko aane de be-maut mar nahin

kyunkar yahan na ek hi karvat pada rahun

hu ka maqam gor ki manzil hai ghar nahin

ran-khan padenge jab kahin dikhlaega vo shakl

be-kisht-e-khun hui ye muhim ho ke sar nahin

ankhen jhapak rahi hain miri barq-e-husn se

pesh-e-nazar ho tum mujhe tab-e-nazar nahin

yaaro batao kis taraf ankhen bichhaun main

us shokh ki kidhar ko hai aamad kidhar nahin

banda-navaz sab hain ruku o sujud men

taaat se ghafil aap ki koi bashar nahin

pariyon ke paas jaun main kyuun dil ko bechne

sauda jo mol luun ye mujhe dard-e-sar nahin

dard-e-firaq-e-yar se donon hain be-qarar

qaabu men dil nahin mutahammil jigar nahin

rah-e-adam men saath rahegi tiri havas

parva nahin na ho jo koi ham-safar nahin

khalvat-sara-e-yar men pahunchega kya koi

vo band-o-bast hai ki hava ka guzar nahin

uthva ke apni bazm se dil ko mire na tod

pahlu men de ke ja mujhe barbad kar nahin

hasti kidhar hai alam-e-arvah hai kahan

ghaflat-zada huun mujh ko kahin ki khabar nahin

zanjir utar gai tira divana mar gaya

sannata qaid-khane men hai shor-o-shar nahin

chandra ke mujh ko bole vo akhir jo shab hui

faq ho gaya hai rang kisi ka sahar nahin

barpa hai hashr-o-nashr jo raftar-e-yar se

ye kaun sa chalan hai qayamat agar nahin

durr-e-najaf to jism hai us naznin ka

mu-e-najaf men baal pada hai kamar nahin

didar ka laga ke main aaya huun aasra

ummid-var huun mujhe mayus kar nahin

yaaro sitam hua hui akhir shab-e-visal

siina ‘sharaf’ ye kuut rahe hain gajar nahin

Leave a Comment