Zahid Chaudhry
vo aftab men hai aur na mahtab men hai
jo raushni ki tire husn-e-be-naqab men hai
chaman men lala-o-gul sharmsar hote hain
ajab tarah ka asar husn-e-be-naqab men hai
main apne ishq-e-faravan pe naaz karta huun
mira kamal mire husn-e-intiḳhab men hai
ujaḌ gaya hai mira gulshan-e-hayat magar
junun-e-shauq mira alam-e-shabab men hai
najat us ki ba-juz ashiqi nahin hogi
phansa hua jo zamane ke pech-o-tab men hai
vo bazm-e-shauq men shamil kabhi nahin hoga
jo bevaquf ki uljha hua hisab men hai
vo valvala hai miri zindagi ki ruh-e-ravan
jo valvala ki mire shauq-e-be-hisab men hai
vo be-naqab kiya jiddat-e-taḳhayyul ne
jo raz-e-kohna rivayat ke naqab men hai
ma.al-e-josh-e-amal sar-bulandi-e-qatra
ye raz-e-zist nihan ḳhema-e-habab men hai
sukut men hai zamane ki maut poshida
hayat vo hai jo har lahza iztirab men hai
mujhe qubul nahin roz-o-shab ki ḳhamoshi
miri hayat faqat shor-e-inqalab men hai
Leave a Reply