barson tiri talab men safina ravan raha
ai mere mehrban bhanvar tu kahan raha
un se mili nazar to palaT kar na aa saki
vo rishta-e-nigah bhi kab darmiyan raha
kab umr-e-ḳhizr ḳhanda-e-gul ka javab hai
yaan do ghaḌi men umr-e-abad ka saman raha
main bhi tire baghair na aram pa saka
tu bhi miri talash men be-ḳhanaman raha
mujh ko gila hai tab-e-muravvat-shi.ar se
saghar-ba-dast ho ke bhi tishna vahan raha
ai daur-e-charḳh ab koi tadbir aur kar
teri sitamgari pe to main shadman raha
mujh ko ‘jalil’ kaun kahega shikasta-dil
khaya tha ek zaḳhm so vo be-nishan raha
Leave a Reply