is lamha-e-viran men chup chand nazar chup
ik raat ki hairat men giraftar nagar chup
kis qatl men matlub hue shahr ko ham log
kyon karne lage apni guzar aur basar chup
kuchh aur abhi bol abhi aur bhi kuchh kah
kyon lab pe vahi mohr-sifat bar-e-digar chup
main sahil dariya se khaḌi dekh rahi huun
sakin hai har ik lahr to har ek bhanvar chup
kis gahre andhere ke tazabzub men ghiri huun
ḳhamosh hai divar yaqin vahm ka dar chup
Leave a Reply