Shakeel Badayuni
shafaq nazaa men le rahi thi sambhala
andhere ka gham kha raha tha ujala
sitaron ke rukh se naqab uth rahi thi
fazaon se mauj-e-shabab uth rahi thi
mai-e-zindagi jam-e-mai-nosh men thi
vo kaif-e-masarrat, vo lamhat-e-rangin
vo ehsas-e-masti vo jazbat-e-rangin
vo pur-kaif aalam vo dilkash nazare
vo jalvon ke bahte hue khushk dhare
vo namkin aghaz-e-shab allah allah
numaish ki vo tab-o-tab allah allah
vo bab-e-muzammil pe jashn-e-charaghan
falak par hon jaise sitare darakhshan
fazaon men gunje hue vo tarane
vo jan-bakhsh naghme vo pur-lutf gaane
vo har samt husn-o-latafat ki janen
vo arasta saaf suthri dukanen
kahin par hai nazzara karigari ka
kahin garm hotel hai peshavari ka
ba-qadr-e-sukun vo dilon ka bahalna
amiron gharibon ka yakja tahalna
numayan numayan vo yaran-e-college
vo ishrat-ba-daman javanan-e-college
koi tez-dasti o chusti pe nazan
koi sehhat o tandurusti pe nazan
koi husn ki jalva-rezi pe maail
koi shokh nazron ki tezi pe maail
idhar chashm-e-hairan ki nazzara-sazi
udhar husn vaalo ki jalva-tarazi
khiraman khiraman vo ham-joliyon men
nikalti hui mukhtalif toliyon men
naqabon men vo be-naqabi ka aalam
jo laata hai dil par kharabi ka aalam
kisi ka vo chehre se anchal uthana
kisi ka kisi se nigahen churana
kabhi yak-ba-yak chalte chalte thaharna
nigahon se jalvon ki islah karna
kabhi ik tavajjoh dukanon ki janib
kabhi ik nazar naujavanon ki janib
tamasha gharaz kamyab aa raha tha
numaish pe goya shabab aa raha tha
idhar ham bhi bazm-e-takhayyul saja kar
khade ho gae ek dukkan pe aa kar
nazar mil gai dafatan ik nazar se
dhadakne laga dil mohabbat ke dar se
idhar to nazar se jabin-saiyan thiin
udhar se bhi kuchh himmat-afzaiyan thiin
khalish dil ki donon ko tadpa gai thi
mohabbat ki manzil qarib aa gai thi
khayalat men is taraf ik talatum
labon par udhar halka halka tabassum
nigahon se ahd-e-vafa ho raha tha
isharon se matlab ada ho raha tha
idhar ishq ke bam-o-dar saj rahe the
ghadi men jo dekha to nau baj rahe the
yakayak javan kuchh mire paas aae
jo the astinon pe bille lagae
kaha itni taklif farmaiyega
numaish se tashrif le jaiyega
gharaz chal diye ghar ko majbur ho kar
mohabbat ke jalvon se maamur ho kar
hui jaari rahi thi ajab halat-e-dil
koi chhin le jaise padhte men novel
ham is tarah bab-e-muzammil se nikle
lahu jaise tuute hue dil se nikle
bahar-e-hal ab bhi vahi hai numaish
naved-e-tarab de rahi hai numaish
vahi jashn hai aur vahi zindagi hai
magar jaise har shai men koi kami hai
are o nigahon pe chha jaane vaali
mire dil ko rah rah ke yaad aane vaali
tiri tarah jalva-numa hai numaish
tire husn ka aaina hai numaish
numaish men teri latafat hai pinhan
numaish men teri nazakat hai pinhan
nigahon ko nahaq tiri justuju hai
yaqinan numaish ke parde men tu hai
Leave a Reply