bayan-e-shauq pe maa.il vo kam-nazar honge
jo zabt-e-shauq ki lazzat se be-ḳhabar honge
laziz ho to hikayat daraz hoti hai
ham ahl-e-gham ke fasane to muḳhtasar honge
milegi ishq ki un men bhi kar-farma.i
vo hadse jo kisi aur naam par honge
khula na tha ye kabhi raaz un ki qurbat men
ki duur ho ke vo mujh se qarib-tar honge
tu aftab-e-haqiqat kahin tulua to ho
na ho saken tire ham ru-ba-ru magar honge
jo gaa.e hain vahi naghme bhi ḳhair mere hain
magar jo ga na saka vo hasin-tar honge
ab un ka zikr miri guftugu men hai ‘maḳhmur’
ab e’tiraz miri baat baat par honge
Leave a Reply