Tariq Naeem
aisi taqsim ki surat nikal aa.i ghar men
dhuup ne hijr ki divar uTha.i ghar men
sail aisa tha ki sab shahr-e-badan Duub gaya
raat barish ne ajab bazm saja.i ghar men
muntazir kitne rahe band dariche saare
teri avaz na phir lauT ke aa.i ghar men
dar-o-divar mahakne lage andazon se
main ne tasvir tiri juun hi laga.i ghar men
yuun hi ik raat use dil se nikala kya tha
phir mujhe raas koi raat na aa.i ghar men
Leave a Reply