dard ki ik kitab hai koi
zindagi iztirab hai koi
tirgi ki ada batati hai
daanv par mahtab hai koi
ho gaya jis ko vo hua tanha
ishq bhi ik azaab hai koi
teri janib hi khinch laati hai
yaad jaise sarab hai koi
us ka khamosh dekhna bhar hi
ik mukammal javab hai koi
ji raha hai magar nahin jiita
yuun bhi khana-kharab hai koi
haae tahrir us ki ankhon ki
go ki mushkil kitab hai koi
tu mere samne rahe phir bhi
main samajhti huun khvab hai koi
tishnagi aur badhti jaati hai
teri qurbat sarab hai koi
Leave a Reply