ham se na hogi tark-e-vafa ye aur kisi ko sunaen aap
ham na sunenge hazrat-e-naseh laakh hamen samjhaen aap
sharm-o-haya ke parde men karte the ham pe jafaen aap
aap ko ham pahchan gae munh anchal se na chhupaen aap
zulf ka tere in se koi mazmun jo raqam ho jaata hai
fart-e-khushi se le leta huun hathon ki apne bulaen aap
vah-ji va bas dekh liya kya vaza ki hai yahi pabandi
kahte is ko hain sharm-o-haya ham jaan se jaaen na aaen aap
sun chuke hal-e-pursish-e-mahshar vaaz ki ‘anjum’ had bhi hai
ye to nahin hai hukm-e-khuda roz ek qayamat dhaen aap
Leave a Reply