Na-Khalaf Mizaj Ki Musaddaqa Taslimat

mere badan ki chaar divari ke liye

khanakti hui mitti kam thi

is liye khuda ne ankhon men kanch bhar diya

aur jahannam ke lapakte hue shoalon ki jalan lahu men rakh di

mere hathon men laq-o-daq sahraon ki retili vahshat

chabae hue aks ki lakiren banati rahti hai

aur zehn ke riste hue patile men

din bhar bardasht ka laava khaulta hai

log apne andazon ki jutiyan

mere ehsas ke darvaze pe utarte hain

aur kufr ki masjid men nange paanv chale aate hain

main apni zaat men itni mutaassib huun ki

lahjon ko un ke maslak se pahchanti huun

aur kisi ba-muravvat khanqah men

majburi ka sajda nahin karti

koi ghaliz muskurahat meri ankhon ko chhuna chahe to

main honton pe thuuk deti huun

lekin sadqa-e-jariya ka surkh rumal ungli pe nahin bandh sakti

Leave a Comment