Sayed Mujeebul Hasan
is samt to mahaul hai pahle se hi bigḌa hua
ai atishin tufan tera kyon idhar aana hua
va.ada tha us ka vo na aaya haan magar aisa hua
ik phuul sahil par nazar aaya mujhe rakkha hua
kis ne qadam rakkhe yahan kis ka idhar phera hua
ḳhushbu se kis ke jism ki ghar hai mira mahka hua
ik abr ke TukḌe ne mere sar pe khincha sa.eban
jab dhuup ke saffak sahra se guzar mera hua
kanTon ki surat phuul bhi piite hain is janib lahu
koi nahin hai saath mere ye bahut achchha hua
ḳhali paḌa hai ik zamane se ye ghar lekin mujhe
mahsus hota hai dariche men koi baiTha hua
paani ka ik qatra na tha maujen na thiin sahil na tha
dekha hai main ne dasht men dariya ajab bahta hua
kal mere kamre men koi tha aur bhi mere siva
main ne jo puchha kaun hai pur-shor sannaTa hua
ye dekhta main aa raha huun ek muddat se ‘mujib’
avaz jab main ne laga.i band darvaza hua
Leave a Reply