ham junun ko zindagi ka mustaqar samjha kiye
ai ‘shifa’ manzil kidhar thi aur kidhar samjha kiye
vaa.e ye kotahi-e-ehsas-o-tangi-e-nazar
zindagi ko zindagi bhar muḳhtasar samjha kiye
karvan pahunche qarib-e-sa.i-e-anjam-e-safar
aur ham mafhum-e-aghaz-e-safar samjha kiye
be-ḳhudi ne kis qadar gumrah rakkha ishq ko
ham tasavvur hi ko husn-e-mo’atabar samjha kiye
dekh kar bhi un ko ham mayus-e-nazzara rahe
har nazar ko laghzish-e-zauq-e-nazar samjha kiye
husn ke rangin muamme ishq ke ghamgin raaz
kuchh samajh men to na aate the magar samjha kiye
zarre zarre ka shu.ur o zehn ko irfan tha
be-ḳhabar the ḳhud jo ham ko be-ḳhabar samjha kiye
aaj tak ham ne farogh-e-dil pe nazren hi na kiin
mehr-o-mah par munhasir apni sahar samjha kiye
dar-haqiqat vo halakat-afrin nikli ‘shifa’
ham jise ab tak mohabbat ki nazar samjha kiye
Leave a Reply