baḌhe kuchh aur kisi iltija se kam na hue
mire harif tumhari dua se kam na hue
siyah raat men dil ke muhib sannaTe
ḳharosh-e-naghma-e-shola-nava se kam na hue
vatan ko chhoḌ ke hijrat bhi kis ko raas aa.i
masa.il un ke vahan bhi zara se kam na hue
faraz-e-ḳhalq se apna lahu bhi barsaya
ghubar phir bhi dilon ki faza se kam na hue
buland aur laven ho ga.iin ummidon ki
diye vafa ke tumhari jafa se kam na hue
bhanvar men Duub ke tariḳh ban ga.e goya
safine ishq ke sail-e-bala se kam na hue
hamare zehn bhaTakte rahe ḳhalaon men
safar nasib ke zanjir-e-pa se kam na hue
sada bahar ḳhayaban-e-arzu tha ‘zafar’
lahu ke phuul hamari qaba se kam na hue
Leave a Reply