buto kuchh had bhi hai jaur-o-jafa ki
hai aḳhir intiha har ibtida ki
jagah kya ho in ankhon men haya ki
bhari ho jin men shoḳhi intiha ki
shab-e-gham aane men karti hai ghamze
ada bhati nahin mujh ko qaza ki
mira dil le ke ab mujh par ye zulm aah
dagha ki tu ne o zalim dagha ki
maza hai mai-kashi ka abr men aaj
falak parchha.i hai rahmat ḳhuda ki
buton ki mehrbani kya karam kya
inayat chahiye mujh par ḳhuda ki
tujhe o bevafa chaha hui chuuk
tujhe dil ne diya main ne ḳhata ki
ye kyon uḌta hai chehre ka mire rang
hui kis shoḳh ko hajat hina ki
vo lenge jaan bhi vaan le ke ik din
ḳhabar thi ibtida men intiha ki
chala dil kucha-e-gesu ko jis dam
dua ki paḌh ke dam radd-e-bala ki
ga.e the vo jahan ham DhunDh lete
madad milti jo un ke naqsh-e-pa ki
dil-e-muztar ki kuchh halat na puchho
taḌap bijli men hai aaj intiha ki
jab aate hain chaḌha jaate hain do phuul
vo turbat par ‘fahim’-e-mubtala ki
Leave a Reply