munafiqat ka har imkan Dha ke nikle the
jo ghar ki aag se daman bacha ke nikle the
lahuluhan hue yuun ki kho ga.i pahchan
ham apne chehre pe va.ade saja ke nikle the
nigah-e-ahl-e-havas kis liye hui ḳhamosh
kuchh astin men ham bhi chhupa ke nikle the
ḳhuda hi jaane jabinon pe nuur sa kyon tha
vo kaun the jo ghar apna luTa ke nikalne the
sab ahl-e-ḳhair nahin hai jo milne aate hain
ye raaz ghar men ham apna bata ke nikle the
kise ḳhabar thi ki aage bhi hai koi divar
ki dil se ham to ye ḳhadsha miTa ke nikle the
ba-faiz-e-charagari aur baḌh ga.iin Tisen
tiri gali se ajab zaḳhm kha ke nikle the
shurua ham ne kiya tha safar vahan se ‘shan’
jahan se raste dasht-e-bala ke nikle the
Leave a Reply