Sufi Tabassum
nazar men Dhal ke ubharte hain dil ke afsane
ye aur baat hai duniya nazar na pahchane
vo bazm dekhi hai meri nigah ne ki jahan
baghair sham.a bhi jalte rahe hain parvane
ye kya bahar ka joban ye kya nashat ka rang
fasurda mai-kade vaale udaas mai-ḳhane
mire nadim tiri chashm-e-iltifat ki ḳhair
bigaḌ bigaḌ ke sanvarte ga.e hain afsane
ye kis ki chashm-e-fusun-saz ka karishma hai
ki TuuT kar bhi salamat hain dil ke but-ḳhane
nigah-e-naz men dil-sozi-e-niyaz kahan
ye ashna-e-nazar hain dilon ke begane
Leave a Reply