Qateel Shifai
ye kis ne kaha tum kuuch karo baten na banao insha-ji
ye shahr tumhara apna hai ise chhoḌ na jaao insha-ji
jitne bhi yahan ke baasi hain sab ke sab tum se pyaar karen
kya un se bhi munh pheroge ye zulm na Dhaao insha-ji
kya soch ke tum ne sinchi thi ye kesar kyari chahat ki
tum jin ko hansane aa.e the un ko na rulao insha-ji
tum laakh siyahat ke ho dhani ik baat hamari bhi maano
koi ja ke jahan se aata nahin us des na jaao insha-ji
bikhrate ho sona harfon ka tum chandi jaise kaghaz par
phir in men apne zaḳhmon ka mat zahr milao insha-ji
ik raat to kya vo hashr talak rakkhegi khula darvaze ko
kab lauT ke tum ghar aaoge sajni ko batao insha-ji
nahin sirf ‘qatil’ ki baat yahan kahin ‘sahir’ hai kahin ‘ali’ hai
tum apne purane yaron se daman na chuḌao insha-ji
Leave a Reply