Nushur Wahidi
ye nim-baz tiri ankhḌiyon ke maiḳhane
nazar mile to chhalak jaa.en dil ke paimane
kahin kali ne tabassum ka raaz samjha hai
jo ḳhud chaman hai vo apni bahar kya jaane
ajab nahin jo mohabbat mujhe samajh na sake
vo ajnabi huun jise ziist bhi na pahchane
jo hosh men tha to koi na mai-ba-jam aaya
bahak gaya huun to duniya chali hai samjhane
fareb-e-mashriq-o-maghrib hain rahravan-e-jadid
ye bad-nasib na aaqil hue na divane
vo zinda hai jo bahe mauj vaqt ki rau men
vo zinda-tar hai jo tufan men Therna jaane
main apni bazm se itna hi duur huun ki ‘nushur’
miri navaon se kuchh ashna hain begane
Leave a Reply