zulm sah kar unhen hasrat se taka karte hain
ham nigahon se bhi fariyad kiya karte hain
mujh se ye kah ke vo tavil-e-jafa karte hain
ham tujhe ḳhugar-e-taslim-o-raza karte hain
gham men ham aish ko yuun jalva-numa karte hain
dard ko dard ki lazzat men fana karte hain
ye bhi mumkin hai ki gham se ho ḳhushi ki takmil
ashk bhi josh-e-masarrat men baha karte hain
jis se malum ye hota hai ki nazdik hai tu
ham bhi vo duur ki avaz suna karte hain
be-ḳhabar apne fara.ez se na gham hai na junun
ham hansa karte hain aur ashk baha karte hain
jaan dete the kabhi ziist pe ham ai ‘shadan’
ab to marne ki tamanna men jiya karte hain
Leave a Reply