tumhen mujh men kya nazar aa gaya jo mira ye ruup bana ga.e
vo tamam log jo ishq the vo mire vajud men aa ga.e
na tire siva koi likh sake na mire siva koi paḌh sake
ye huruf-e-be-varaq-o-sabaq hamen kya zaban sikha ga.e
na kar aaj ham se ye guftugu mujhe kyuun hui tiri justuju
are ham bhi ek ḳhayal the so tire bhi zehn men aa ga.e
jo suna ki ghar tire ja.enge tire sehan o baagh saja.enge
mire ashk uḌ ke hava ke saath unhi badalon men sama ga.e
dil-e-shab men sub.h ki dhaḌkanen abhi ibtida-e-ghazal men thiin
ki vo aa.e aur tamam sher miri hi dhun men suna ga.e
jo na aap us pe hue ayaan ye rakhega ham ko bhi sar-giran
ka.i baar le ke shikayaten mire dost arz o sama ga.e
ka.i mahfilon men to yuun hua ki jab aa.e ‘ali’-e-ḳhush-ada
jo na khul sake to chhupe rahe jo na ro sake to rula ga.e
Leave a Reply