Zakir Khan Zakir
hasin yaden sunahre ḳhvab pichhe chhoḌ aa.e hain
muhajir ki kahani men hazaron moḌ aa.e hain
na khul paaya kabhi bab-e-mohabbat kam-nasibon par
fasil-e-shahr-e-janan se ka.i sar phoḌ aa.e hain
bashar ki be-sabati bhi kisi se hal na ho paa.i
zamin se chand taron tak sabhi sar joḌ aa.e hain
mile roTi ke TukḌe kuchh magar tum ye bhi socho kab
shikam ki aag men ham ahd-o-paiman toḌ aa.e hain
pila de apne hathon se zara ik jaam ai saaqi
tire mai-kash dar-o-divar-o-dirham chhoḌ aa.e hain
Leave a Reply