safar ke tajrabon men gard-e-pa bhi aa hi jaati hai
magar us pech-o-ḳham se kuchh jila bhi aa hi jaati hai
jo chalta huun falak se ḳhuun ke favvare baraste hain
jo rukta huun samum-e-fitna-za bhi aa hi jaati hai
ḳhirad ki saans bhi ruk jaati hai tira-ḳhayali se
tah-e-ehsas nadida bala bhi aa hi jaati hai
jo paude sahn men khilte hain un ko dhuup lagti hai
daraḳhton se tar-o-taza hava bhi aa hi jaati hai
hare rah ja.enge jan-dar patte zard mausam men
ḳhizan-baḳhti men jiine ki ada bhi aa hi jaati hai
unhin se qarya-e-jan men vufur-e-dard hota hai
unhin nazron men tasir-e-shifa bhi aa hi jaati hai
Leave a Reply