Kaleem Aajiz
zaḳhmon ke na.e phuul khilane ke liye aa
phir mausam-e-gul yaad dilane ke liye aa
masti liye ankhon men bikhere hue zulfen
aa phir mujhe divana banane ke liye aa
ab lutf isi men hai maza hai to isi men
aa ai mire mahbub satane ke liye aa
aa rakh dahan-e-zaḳhm pe phir ungliyan apni
dil bansuri teri hai bajane ke liye aa
haan kuchh bhi to derina mohabbat ka bharam rakh
dil se na aa duniya ko dikhane ke liye aa
maana ki mire ghar se adavat hi tujhe hai
rahne ko na aa aag lagane ke liye aa
pyare tiri surat se bhi achchhi hai jo tasvir
main ne tujhe rakkhi hai dikhane ke liye, aa
ashufta kahe hai koi divana kahe hai
main kaun huun duniya ko batane ke liye aa
kuchh roz se ham shahr men rusva na hue hain
aa phir koi ilzam lagane ke liye aa
ab ke jo vo aa jaa.e to ‘ajiz’ use le kar
mahfil men ghazal apni sunane ke liye aa
Leave a Reply