dil par sitam hazar kare bevafa ke lab
barchhi kabhi kaTar lage dilruba ke lab
guft-o-shunid men baḌe bebak hain magar
dekha mujhe to khul na sake lab-kusha ke lab
guftar-o-an-ban ka aalam na puchhiye
ḳhush-rang-o-jan-faza hain mire ham-nava ke lab
ho jaa.e pal men ḳhaak vo jis ko ye chuum len
jalte hue sharare hain jan-e-ada ke lab
bosa liya to husn ne sharma ke yuun kaha
raushan kiye hain aap ne mehr-o-vafa ke lab
ma.asumiyat to dekhiye ba.ad-e-shab-e-zifaf
ma.ashuq shikva-sanj hua hai dikha ke lab
baghon se ham jo guzre to phulon ne di sada
kitne hasin hain ‘shad’ tiri dilruba ke lab
Leave a Reply