Apni Aankhon Mein Basa Lo Ya Gira Do Mujhko

Navin C Chaturvedi

apni ankhon men basa lo ya gira do mujh ko

qatra-e-ashk huun jo chahe saza do mujh ko

surat-e-sham-e-sar-e-bazm jala do mujh ko

sub.h ho jaa.e to anval se bujha do mujh ko

main to bimar-e-mohabbat huun mere charagaro

ab to bas zulf-e-mo.ambar ki hava do mujh ko

ik siva tere mujhe yaad na aa.e kuchh bhi

is qadar ishq men divana bana do mujh ko

mere dil men na koi hasrat-e-didar rahe

kaash ik baar ruḳh-e-zeba dikha do mujh ko

is qadar apne nazar se ho ḳhafa Thiik nahin

kya ḳhata meri hai bas itna bata do mujh ko