Razi Akhtar Shauq
yuun to likhne ke liye kya nahin likkha main ne
phir bhi jitna tujhe chaha nahin likkha main ne
ye to ik lahr men kuchh rang jhalak aa.e hain
abhi mujh men hai jo dariya nahin likkha main ne
mere har lafz ki vahshat men hai ik umr ka ishq
ye koi khel-tamasha nahin likkha main ne
likhne vaala main ajab huun ki agar koi ḳhayal
apni hairat se na nikla nahin likkha main ne
meri nazron se jo ik baar na pahuncha tujh tak
phir vo maktub dobara nahin likkha main ne
meri sachcha.i har ik lafz se lau deti hai
jaise sab likhte hain vaisa nahin likkha main ne
Leave a Reply