chand mohmal si sargoshiyon se pare ḳhamushi ki rida men hain lipTe hue
lab-ba-lab ho ga.e jab zamin asman chand ubhra ufuq par chamakte hue
raat ham se baghal-gir aise hui saare raushan tasavvur hue sanvle
raah suraj ki takte rahe sub.h tak ham ujale ki chaukhaT pe baiThe hue
lazzat-e-lams se band ankhen huiin sirf sanson se hoti rahi guftugu
rafta rafta pighalte rahe barf se phir dhuan ho ga.e jism jalte hue
pahli barish mohabbat ki thi aur ham asmanon ki janib chale be-ḳhatar
phir hava daf.atan samne aa ga.i apne Denon pe talvar bandhe hue
un luTeri nigahon ko kya hai ḳhabar chiir kar siina aa.e hain jo sat.h par
kitne taklif-dah hain samundar ko ye ḳhushbuon ke jazire ubharte hue
asman par dhanak badalon men chamak baaz ki paini nazren hadaf par lagin
chhat pe jangali kabutar hai sahma hua apne bhige paron ko sameTe hue
zehn men ek manzar hai chipka hua jaise mehman-ḳhane men ho painting
chand ke gore mukhḌe pe uljhi ghaTa aankh bhigi hui lab hain sulge hue
aankh men jagmagati hui ḳhvahishen nim-shab sharm ki jhalaren ban ga.iin
kamna.en dulhan ban ke itra rahin karchobi sharara sanbhale hue
mere bistar pe kirchen hain tanha.i ki ḳhvab TuuTe hue ḳhushk ankhon men hain
jazb jo kar sake ab vo anchal nahin ashk Darte hain ghar se nikalte hue
Leave a Reply