vo dil ki tha kabhi sarsabz khetiyon ki tarah
sulag raha hai jhulaste hue thalon ki tarah
ye sher jis ki zamin ko bhi mujh se shikve hain
rahega yaad purani mohabbaton ki tarah
kisi jagah pe bhi sayyah dil Thahar na saka
jahan ki sair ko nikle musafiron ki tarah
utarti zehan men bhi ḳhush-gavar dhuup kabhi
shuru-e-garma ke khulte hue dinon ki tarah
lahu rulati hai be-vaqt tang karti hai
hai us ki yaad bhi be-rut ki barishon ki tarah
tumhari chaah ka anjam dekhiye kya ho
laga ke baiThe hain daav juariyon ki tarah
ḳhud apne saa.e se bhi kaanp kaanp uThta huun
main sahma phirta huun mafrur mulzimon ki tarah
us aankh men koi be-rang si kashish thi ‘riyaz’
purane qilon men kunda ibaraton ki tarah
Leave a Reply