Shohrat Bukhari
aao ki abhi chhanv sitaron ki ghani hai
phir shaam talak dasht-e-gharib-ul-vatani hai
kuchh bhi ho magar husn ki fitrat men abhi tak
pabandi-e-rasm-o-rah-e-ḳhatir-shikani hai
mat puchh ki kya rang hai zabt-e-gham-e-dil men
har ashk jo piita huun vo hiire ki kani hai
sha.ir ke taḳhayyul se charaghon ki lavon tak
har chiiz tiri bazm men tasvir bani hai
tum jis ko bahut samjhe to ik buund lahu ki
puchho mire daman se aqiq-e-yamani hai
ma.alum hua jab ki raha kuchh bhi na dil men
bas ek nazar qimat-e-duniya-e-dani hai
iblis ho suqrat ho sarmad ho ki mansur
ḳhud-agahi har shakl men gardan-zadani hai
maqsud na bulbul hai na tuuti hai na qumri
matlab to chaman valon ka navak-fagani hai
asa.ish-e-geti hai saza be-hunari ki
azurdagi-e-dil sila-e-ḳhush-suḳhani hai
kin phuul fazaon ki tavaqqo men paḌe ho
hoshyar ki yaan zauq-e-saba sho.ala-zani hai
aao chalen us anjuman-e-bul-havasan se
atish-nafasai hai na jahan gul-badani hai
‘shohrat’ se kabhi jaan talab kar ke to dekho
har-chand tahi-dast hai par dil ka ghani hai
Leave a Reply