Aks-E-Rukh-E-Gulgun Se Tamasha Nazar Aaya

aks-e-rukh-e-gulgun se tamasha nazar aaya

aina unhin phulon ka duuna nazar aaya

khubi men do-bala vo sarapa nazar aaya

pur-nur badan paikar-e-jauza nazar aaya

dil khush guhron ka hamen sahra nazar aaya

kya gard-e-yatimi ka bagula nazar aaya

nairangi-e-hairat se ravan rahte hain aansu

tasvir ka dariya hamen bahta nazar aaya

nikla jo hava-var men vo rashk-e-sulaiman

udta su-e-aflak farishta nazar aaya

balida hai har shisha-e-mai ab ki yahan tak

ek ek falak pamba-e-mina nazar aaya

khilat mujhe vahshat ne diya vusat-e-dil ka

jaame men mire daman-e-sahra nazar aaya

nazron men ye chhaya hai ghubar-e-dil-e-vahshi

har aankh men aansu mujhe dhela nazar aaya

vo aina-sima hai dil-e-sakht-adu men

botal men utarte hue shisha nazar aaya

ashiq tire palkon ka hua zinda-e-javed

suuli ka kharidar masiha nazar aaya

zahid ne bhi aqd aaj kiya bint-e-inab se

juft-e-bat-e-mai murgh-e-musalla nazar aaya

bargashta-nasibi-e-sadaf-e-dil ki kahun kya

moti ke evaz is men phaphula nazar aaya

aina-e-geti men vahi aks hai har su

ham ne jidhar us shokh ko dekha nazar aaya

karte ho mire paikar-e-vahmi ko nishana

navak men tumhare par-e-anqa nazar aaya

us but ke nahane se hua saaf ye paani

moti bhi sadaf men tah-e-dariya nazar aaya

us huur ki rangat udi rone se hamare

rang-e-gul-e-firdaus bhi kachcha nazar aaya

shisha mai-e-gulgun ka unhen madd-e-nazar hai

tegh-e-nigah-e-mast men chhala nazar aaya

ho jaenge sab koh-e-jahan sang-e-falakhan

vahshat men jo aalam tah-o-bala nazar aaya

shamen jo bujhin bazm-e-tilismat ko dekha

ankhen jo huiin band to kya kya nazar aaya

kyuun khush na ho til baith ke mizan-e-falak men

mauzun-e-qad-e-yar ka palla nazar aaya

mil mil gae hain khaak men lakhon dil-e-raushan

har zarra mujhe arsh ka taara nazar aaya

ankhon men khatakti hai yahi daulat-e-duniya

har sikke ki machhli men bhi kanta nazar aaya

hai bud-e-jahan naqsh sar-e-ab nazar men

ye khel hamen ban ke bigadta nazar aaya

hairat-kada-e-dahr hua mujh se mukaddar

aina-e-ijad men dhabba nazar aaya

khush aate nahin daant kisi huur ke mujh ko

chak-e-gul-e-firdaus men bakhiya nazar aaya

muddat se nazar-dokhta rahte hain giraftar

gesu ki bhi zanjir men tanka nazar aaya

champa-kali us mast-e-mai-e-husn ki dekhi

gardan ki surahi ka ye miina nazar aaya

madfun hua zer-e-zamin aap ka laghar

chashm-e-lahad-e-tang men jaala nazar aaya

kalkatta men har dam hai ‘munir’ aap ko vahshat

har kothi men har bangle men jangla nazar aaya