tera ehsas-e-ḳhudi hoga na jab tak bedar
ghair mumkin hai khulen tujh pe azal ke asrar
ḳhud mashiyyat tiri ek ek ada par ho nisar
apni surat ka mayassar jo tujhe ho didar
kitne jalve tujhe labbaik kahenge nadan
chiir kar dekh zara sina-e-hasti ik baar
apni quvvat se tu vaqif hi nahin hai varna
arsh se bhi kahin uncha hai tira izz-o-vaqar
maut sab jis ko samajhte hain zamane vaale
tere pairahan-e-hasti ka hai dhundla sa ghubar
sab tire zer-e-nagin hain falak-o-mah-o-nujum
teri gardish pe hai har ek ki gardish ka madar
phunk de ḳhar-o-ḳhas-e-alam-e-zahir pahle
ḳhud nazar aa.ega har shai men ruḳh-e-pur-anvar
husn-e-sad-rang se vo kaif-e-nazar hasil kar
jis se ho jaa.en dil-o-ruh abad tak sarshar
ik ravish bhi na guzargah-e-ḳhizan ho jis ki
tujh se mumkin ho to paida kar ik aisi bhi bahar
sar-e-amvaj-e-havadis ko samajhne vaale
kar-e-asan ko bana lete hain kar-e-dushvar
laakh saman hon ishrat ke muhayya lekin
dil si shai ke liye duniya men sukun hai na qarar
zindagi bhar jinhen kahti rahi duniya kafir
ab zamane men kahan ‘arzu’ aise din-dar
Leave a Reply