gum-shuda tanha.iyon ki raz-dan achchhi to ho
main yahan achchha nahin huun tum vahan achchhi to ho
vaqt-e-ruḳhsat bhige bhige in darichon ki qasam
nur-paikar chand-surat gulistan achchhi to ho
thartharate kanpte honTon ko aaya kuchh sukun
ai zaban rakhte hue bhi be-zaban achchhi to ho
dhuup ne jab aarzu ke jism ko nahla diya
ban ga.i thiin tum vafa ka sa.eban achchhi to ho
raat bhar chille vazife vo tahajjud aur fajr
mil gaya ab to sila ai meri maan achchhi to ho
is zamane men jab apnon ka bharosa ho fareb
sochti rahti ho main ja.un kahan achchhi to ho
jhilmilate hain sitare raat ko palkon pe jab
chand se sunti ho meri dastan achchhi to ho
vo tumhari ik saheli ban ga.i thi jo dulhan
us se ḳhat likh kar kabhi puchha nihan achchhi to ho
jab kahin jaao to likh dena mujhe apna pata
puchhne varna main ja.unga kahan achchhi to ho
tum sada achchhi raho ‘azar’ ki hai bas ye dua
fasle sadiyon ke hain ab darmiyan achchhi to ho
Leave a Reply