Javed Jameel
miri chaah men mire ishq men tu kabhi kisi se laḌa nahin
isi bhuul ka ye azaab hai tu mira nahin main tira nahin
tha gulab main thi ye aarzu tire gesuon men khilun kabhi
nahin khil saka to ye jaan le ye tiri hai meri ḳhata nahin
tiri yaad mujh se bahut laḌi mire ang ang men zaḳhm hai
main taḌapta rahta huun dard se tujhe fikr meri zara nahin
mira dil to tere hi paas hai tu ise khangal ke dekh le
vahan tu hi tu hai har ik taraf vahan kuchh bhi tere siva nahin
tire ishq se mujhe kya mila miri zindagi hui maut si
mujhe ab talash sukun ki hai mujhe ab junun-e-hina nahin
mujhe aisi zaat se ishq hai jo ho mehrban to maut kab
hai fana.iyat men nihan baqa hai baqa agar to fana nahin
Leave a Reply