Tariq Naeem
is raat kisi aur qalam-rau men kahin tha
tum aa.e to main apne badan hi men nahin tha
kya bazm thi us bazm men kaun aa.e hue the
mahtab bhi suraj bhi sitara bhi vahin tha
kuchh niind se bojhal thiin tire shahr ki ankhen
kuchh meri kahani men bhi vo rabt nahin tha
kahte hain ki ruk si ga.i raftar-e-zamana
jab sair-e-samavat men ik ḳhak-nashin tha
ai kaash zara der na tum raah badalte
do chaar qadam aur mira shahr-e-hazin tha
aise to nahin auj pe aaya tha sitamgar
vo ḳhud bhi hasin us ka sitara bhi hasin tha
main ḳhal-e-ruḳh-e-yar pe de deta samarqand
lekin vo ilaqa bhi mire paas nahin tha
Leave a Reply