ab apne dida-o-dil ka bhi e’tibar nahin
usi ko pyaar kiya jis ke dil men pyaar nahin
nahin ki mujh ko tabi.at pe iḳhtiyar nahin
har ik jaam se pi luun vo bada-ḳhvar nahin
har ek gaam pe kanTon ki hain kamin-gahen
shabab aah shagufon ki rahguzar nahin
bhari hui hai vo kam-o-dahan men talḳhi-e-zist
ki lab pe jam-e-mohabbat bhi ḳhush-gavar nahin
na mere ashkon se daman pe tere aa.egi aanch
ye sho.ala-ru hain magar fitrat-e-sharar nahin
kahin chhupa.e se chhupti bhi hai haqiqat-e-gham
vo gham hi kya jo masarrat se ashkar nahin
main teri yaad se bahka chuka huun yuun dil ko
ki ab mujhe tiri furqat bhi nagavar nahin
mire sukun ke liye kyuun ye koshish-e-paiham
qarar chhinne vaale tujhe qarar nahin
jahan-e-aql ke nafrat-kadon men baT jaata
hazar shukr mohabbat pe iḳhtiyar nahin
kisi ki luuT ke rahat ḳhushi nahin milti
ḳhizan ke haath men sarmaya-e-bahar nahin
nigah-e-dost ko is ki bhi hai ḳhabar lekin
vo raaz jis ka abhi dil bhi razdar nahin
tavajja-e-nigah-e-yar ka sabab ma.alum
dil-e-girafta-e-‘mulla’ abhi shikar nahin
Leave a Reply