Amir-e-Shahr Ki Chaukhat Pe Ja Ke Laut Aaya

Sufi

amir-e-shahr ki chaukhat pe ja ke laut aaya

gharib-e-vaqt angutha dikha ke laut aaya

laga raha tha main badh chadh ke boliyan lekin

kharida kuchh nahin qimat badha ke laut aaya

kasar rahi-sahi kar dengi andhiyan puuri

main us darakht ko jad se hila ke laut aaya

main chand chhune ki khvahish men ghar se nikla tha

aur apni palkon pe taare saja ke laut aaya

bujha diya tha jise sar-phiri havaon ne

main us charagh ko phir se jala ke laut aaya

vo ibtida-e-safar men hi khul gaya mujh par

main us ke saath zara duur ja ke laut aaya

‘kamal’ us ne mire dil ka haal puchha tha

main us ko ‘mir’ ki ghazlen suna ke laut aaya