Habib Jalib
dushmanon ne jo dushmani ki hai
doston ne bhi kya kami ki hai
ḳhamushi par hain log zer-e-itab
aur ham ne to baat bhi ki hai
mutma.in hai zamir to apna
baat saari zamir hi ki hai
apni to dastan hai bas itni
gham uTha.e hain sha.eri ki hai
ab nazar men nahin hai ek hi phuul
fikr ham ko kali kali ki hai
pa sakenge na umr bhar jis ko
justuju aaj bhi usi ki hai
jab mah-o-mahr bujh ga.e ‘jalib’
ham ne ashkon se raushni ki hai
Leave a Reply