hai jo ḳhamosh but-e-hosh-ruba mere baad
gul khila.ega koi aur naya mere baad
tu jafaon se jo badnam kiye jaata hai
yaad aa.egi tujhe meri vafa mere baad
koi shikva ho sitamgar to zahir kar de
phir na karna tu kabhi koi gila mere baad
ibrat-angez hai afsana mire marne ka
ruk ga.e hain qadam-e-umr-e-baqa mere baad
zamzame ḳhana-e-sayyad ke kyuun gunjte hain
kya koi taaza giraftar hua mere baad
sar ke bal ishq ki manzil ko kiya tai main ne
nahin milte jo nishan-e-kaf-e-pa mere baad
‘sabir’-e-ḳhasta ko har haal men ya rab rakh shaad
kahin aisa na ho ho sabr fana mere baad
Leave a Reply