Kuchh KHak Se Hai Kaam Kuchh Is KHak-Dan Se Hai

kuchh ḳhaak se hai kaam kuchh is ḳhāk-dāñ se hai

jaanā hai duur aur guzarnā yahāñ se hai

dil apnī rā.egānī se zinda hai ab talak

ābād ye jahāñ bhī ġhubār-e-jahāñ se hai

bas ḳhaak paḌ ga.ī hai badan par zamīn kī

varna mushābahat to mirī āsmāñ se hai

dil bhī yahī hai vaqt bhī manzar bhī niiñd bhī

jaanā kahāñ hai ḳhvāb meñ jaanā kahāñ se hai

ik dāstāñ qadīm hai ik dāstāñ darāz

hai shaam jis kā naam vo kis dāstāñ se hai

vābasta mez-posh ke phūloñ kī zindagī

mehmān se hai mez se hai mezbāñ se hai

Leave a Comment