kuchh ḳhaak se hai kaam kuchh is ḳhak-dan se hai
jaana hai duur aur guzarna yahan se hai
dil apni ra.egani se zinda hai ab talak
abad ye jahan bhi ghubar-e-jahan se hai
bas ḳhaak paḌ ga.i hai badan par zamin ki
varna mushabahat to miri asman se hai
dil bhi yahi hai vaqt bhi manzar bhi niind bhi
jaana kahan hai ḳhvab men jaana kahan se hai
ik dastan qadim hai ik dastan daraz
hai shaam jis ka naam vo kis dastan se hai
vabasta mez-posh ke phulon ki zindagi
mehman se hai mez se hai mezban se hai
Leave a Reply