Be-Tarah Dil KHushi Se Darta Hai

be-tarah dil ḳhushī se Dartā hai

kaun itnā kisī se Dartā hai

uf re nairañgiyāñ zamāne kī

aadmī aadmī se Dartā hai

dushmanī hī na ho ma.aal us kā

dil tirī dostī se Dartā hai

ye bhī hai ik ta.alluq-e-ḳhātir

kaun varna kisī se Dartā hai

manzileñ gard ban ga.iiñ phir bhī

rahnumā rahbarī se Dartā hai

ishq farmā-ravā-e-haft-aflāk

aap kī barhamī se Dartā hai

jab se vo be-vafā hue ‘sāhir’

dil mirā har kisī se Dartā hai

Leave a Comment