muḳhtasar vaqt hai par baten kar
zindagi beach safar baten kar
aa kabhi hujra-e-dil men mere
raat ke pichhle pahar baten kar
chal chala ja.un tujhe le kar main
phir kisi ḳhvab-nagar baten kar
chhoḌ kar duniya-o-din ki baten
hai to dushvar magar baten kar
lam-yazal sher ki surat tu bhi
masnad-e-dil pe utar baten kar
zindagi raqs men hai meri jaan
baiTh ja shor na kar baten kar
tere ehsas ko tasvir karun
ab to kaghaz pe ubhar baten kar
guftugu tujh se karun aise men
khulne lagta hai hunar baten kar
baat ka izn diya jab us ne
phir tujhe kis ka hai Dar baten kar
teri takmil hua chahti hai
chaak se ab tu utar baten kar
Leave a Reply