Zakir Khan Zakir
badan ke dosh pe sanson ka maqbara main huun
ḳhud apni zaat ka nauha huun marsiya main huun
bila-sabab bhi nahin yasiyat tabi.at men
azal se ḳhana-badoshi ka silsila main huun
mira vajud tumhari baqa ka zamin hai
tumhare an-kahe jazbon ka aa.ina main huun
baharen jis pe hon nazan chaman bhi rashk kare
nazar-navaz ruton ka vo qafila main huun
bichhaḌ ke mujh se abas manzilon ki chahat hai
jidhar bhi jaoge har-samt rasta main huun
un ahaTon pe miri vahm ka guman kaisa
main kah chuka huun miri jaan barha main huun
ghazal hai koi to main bhi huun lazmi hissa
kisi hayat ke misre men qafiya main huun
tumhen ḳhabar ho to dena pata mujhe ‘zakir’
jise talash hai ḳhud ki vo gum-shuda main huun
Leave a Reply