ghira huun do qatilon ki zad men vajud mera na bach sakega
main zard jangal se bach gaya to pahaḌ ik mushta.il milega
hazimaton ke safar ka raahi ufuq ko dekhega bebasi se
ufuq se baḌhta hua samundar zamin ko qadmon se khinch lega
jala ke ghar se raqib sham.en hava men ham tum nikal paḌe hain
yahi hai donon ko intizar ab ki pahle kis ka diya bujhega
phir ek saffak saḳht jhonka barahana-tar kar gaya shajar ko
jab us ko dekhoge ḳhatm-e-shab men to patte patte se Dar lagega
gudaz jismon ki ahaTon ka tilism TuuTa navah-e-jan men
faza se ab koi haath baḌh kar ujaḌte mausam men aag dega
Leave a Reply