Ezaz Afzal
ai naqsh-garo lauh-e-tahrir hamen de do
ham apne musavvir hain tasvir hamen de do
aghosh-e-kaman ab tak afkar ka ḳhali hai
tum apni nigahon ke kuchh tiir hamen de do
kya tol rahe ho tum hathon men ḳhirad-mando
zevar ye junun ka hai zanjir hamen de do
ai ḳhali kaToron ke be-kaif nigahbanon
mai-ḳhana hamari hai jagir hamen de do
tum to na jhuka paa.e gardan dil-e-sarkash ki
ai ahl-e-sitam laao shamshir hamen de do
ashufta lakiren hain tahrir ki nau-mashqi
likh lenge hamin lauh-e-taqdir hamen de do
Leave a Reply