Wahshat Raza Ali Kalkatvi
labrez-e-haqiqat go afsana-e-musa hai
ai husn-e-hijab-ara kis ne tujhe dekha hai
mahfil si saja.i hai didar ki hasrat ne
har-chand tira jalva mahbub-e-tamasha hai
miTta hai kabhi dil se naqsh us ki mohabbat ka
nakam tamanna bhi majbur tamanna hai
jazbat ki duniya men barpa hai qayamat si
is haal men ru-poshi kya aap ko zeba hai
saaqi tiri mahfil ko rangin kiya jis ne
vo ḳhuun hai taqve ka ya jalva-e-mina hai
ik sheva taghaful hai ik ishva tajahul hai
ghussa hai baja tera shikva mira beja hai
ye be-dili achchhi hai divana na ban ‘vahshat’
anjam tamanna ka hasrat ke siva kya hai
Leave a Reply