Nazish-E-Gul Hua Kare Koi

nazish-e-gul hua kare koi

dil se kanTa juda kare koi

bahte hain baat baat par aansu

aisi ankhon ko kya kare koi

jab kisi baat men asar hi nahin

kya dava kya dua kare koi

kaun hai vo jo dard-mand nahin

kis ki kis ki dava kare koi

jab kaleje men tiir ho paivast

na karahe to kya kare koi

zabt ki had hai maut tak lekin

phir sitam ho to kya kare koi

kuchh nahin jis men dard-e-dil ka ilaaj

aisi duniya ka kya kare koi

aa chala lutf-e-zindagi ham ko

dard ab to siva kare koi

maut hai imtihan-e-shauq ‘jigar’

varna kyunkar vafa kare koi